محمد عالم کۉهکن شعرلریدن...

۲۰۱۷-۰۲-۲۸

مېن کیم‌من؟

مېن اېسلردن چیققن خاطره،
کیپریکلردن تۉکیلگن یاش‌من.
مېن کۉزلرگه ایلینمه‌گن خس،
سان۔سناق‌قه کیرمه‌گن باش‌من.

 

نوا

کویلرده‌گی محزون بیر نوا،
غیجّکلر نینگ مونگلی ناله‌سی
اده‌شگن قوش‌ چرچاق قناتی
مجنون تال‌ نینگ اېگیک یالهسی

 

آرزولریم

آرزولریم قیینه‌یدی مېنی،
اوشالمسدن قرریدیم دېیدی.
اېسکی یۉلداش لریم ۔ ارمانلر همان
مېنده‌‌ک تۉییب۔تۉییب

حسرت، غم یېیدی.

 

 یَشَم
اۉتمیشینگ اېسده‌لیک، خاطره فقط،
کېله‌جک موهوم دیر تصور همان.
یَشَم شو آنلر دیر
شو دم دیر یَشمَ.

 

الملر
اۉتر هر کون الملر تازه بۉلگه‌ی
کۉنگل ‌نینگ دردی بې اندازه بۉلگه‌ی
کوتیب مهرینگ، محبت کۉرمه‌گن دل
ېیتیم باله مثالی نازه بۉلگه‌ی...

 

مأیوس یوره‌ک

اوییمده‌گی گل بُته‌لریم
یم۔یشل یپراغلر، شاخچه‌لر ایچره
قیب۔قیزیل گل آچدی، چقنه‌دی، کولدی
لېکن مېنینگ محزون مأیوس یوره‌گیم
بیر یۉلی کولمه‌دی

 گُلدېک آچیلیب.

 

 یوررمن

سېنی اۉیلب سېنی سۉیلب یوررمن
قۉشیغیمده سېنی کویلب یوررمن
بیرار مرته کۉره‌ی دېب گل یوزینگنی
دېوارینگدن مدام بۉیلب یورر من

 

اۉرته‌دی

اۉرته‌دی جانیمنی هجران اۉرته‌دی
هجرینگ اۉتدی حدیدین جان اۉرته‌دی
ایکّی کافر کۉزلرینگ نینگ شعله‌سی
اۉت یاقیب کۉنگلیمده ایمان اۉرته‌دی

 

آزاده یورت
وطنداشیم وطن جسمی یرا دور
وطن دشمنلری کۉنگلی قرا دور
کېلینگلر بیرلَشه‌‌یلیک، بیرلَشه‌‌یلیک
وطنده بیر بۉلیب، بیرگه یشه‌‌یلیک...
یېتر شونچه جدالیک، بېنوالیک
قیله‌‌یلیک بیر بیراوگه آشنالیک
وطن ویرانه دور اې مهربانلر
بو خسته تنگه بېرسک تازه جانلر
چمن بۉلسین قوروق دشت و بیابان
آسه‌‌یلیک بۉینیمیزگه لعل و مرجان
بیله‌‌یلیک قدریمیز، انسانمیز آخر
که بیر میز، بیر بیراوگه جانمیز آخر
بیزه یخشی تیریک یۉق، اې یارانلر
بیزه یخشی، اۉلیکلر۔قهرمانلر!
تیریک میز قدریمیزنی بیلمه‌‌گه‌یمیز
کۉریب بیر۔بیرنی کۉزگه اِیلمه‌‌گه‌یمیز
کېلینگ بیر تن بۉلیب بیر جان بۉله‌‌یلیک
بیله‌‌یلیک دردیمیز، درمان بۉله‌‌یلیک
مدام بو یورتیمیز آزاده بۉلسین
توغیلگن نسل تېمورزاده بۉلسین
وطن یاره‌ تنی درمانگه محتاج
بوزولگن جسمی تازه جانگه محتاج
مېن و سېن بیز بۉله‌‌یلیک، بیز بۉله‌‌یلیک
آنه یورتیمگه اۉغیل۔قیز بۉله‌‌یلیک
بو ویران کلبه میزگه اۉت قۉییلدی
یوز اېرمس، مینگ و مینگ انسان سۉییلدی
قه‌‌یېردن فتنه آچدی گبر و شیطان
مسلمانگه بۉلیب دشمن مسلمان
اوریبمیز تیشه‌لر اۉز ریشه‌میزگه
سالیب یغما ینه اندیشه میزگه

 

التماس!
قۉی غمیم بیرله اۉله‌ی،
ایریلیق دردینی چېکمک هم اۉلیمدن دیر یامان،
عمرلر همدم بۉلیب یورگن غمیمدن
لحظه اجره‌تمنگ مېنی!...
بو حیاتیم،
غملریم بیرله تاپر معناسینی!

 



شو موضوعده