اۉزبېگیم ۔ قصیده

۲۰۱۷-۰۶-۰۱

 

اۉزبېگیم

 

تاریخینگ دیر مینگ عصرلر ایچره‌ پنهان، اۉزبېگیم،

سېنگه تېنگداش پامیرو آق‌ساچ تيانشان، اۉزبېگیم.

سۉیله‌سین افراسياب و سۉیله‌سین اۉرخون خطی،

کهنه‌ تاریخ شاده‌سیده بیتّه‌ مرجان، اۉزبېگیم.

البېروني، الخوارزمي، الفاراب اولادیدن،

اصلی نسلی بلکه‌ اۉزلوق، بلکه‌ ترخان، اۉزبېگیم.

اۉتدیلر شۉرلیک باشینگدن اۉینه‌تیب شمشیرلرین

نېچه‌ قاآن، نېچه‌ سلطان، نېچه‌ مینگ خان، اۉزبېگیم.

تاغلرینگ تېگره‌نگده گۉیا بۉغمه‌ اژدر بۉلدی-یو،

ایکّی دریا - ایکّی چشمینگ، چشمِ گریان، اۉزبېگیم.

قَیصری روم نیزه‌سیدن بغریده داغ اوزره‌ داغ،

چینگیز و باتو تیغیگه کۉکسی قلقان، اۉزبېگیم.

یاغدی تۉرت یاندین عصرلر باشینگگه تيرِ کمان،

عمری قربان، ملکی تاراج، یورتی ویران، اۉزبېگیم.

دور ظلمیگه و لېکن بیر عمر باش اېگمه‌دینگ،

سېن - مقنع، سربدار - سېن، اېرک‌سېور قان، اۉزبېگیم.

سېن نه‌ زردُشت، سېن نه‌ بودي، سېنگه نه‌ آتش، صنم،

آدمي‌لیک دینی بیرله تازه‌ ایمان، اۉزبېگیم.

معرفت نینگ شعلسیگه تَلپینیب ظلمت ارا،

کۉزلرینگده آقدی تونلر کوکبستان، اۉزبېگیم.

توزدی-یو میرزا اولوغ‌بېک کۉره‌گاني جدولین،

سِرلی آسمان تاقیگه ایلک - قۉیدی نروان، اۉزبېگیم.

میر علیشېر نعره‌سیگه عکس-صدا بېردی جهان،

شعریت ملکیده بۉلدی شاه و سلطان، اۉزبېگیم.

علم و شعرده شاه و سلطان،لېک تقدیریگه قول،

اۉز اېلیده چېکدی غربت، زارو نالان، اۉزبېگیم.

میرزا بابر - سېن، فغانینگ سالدی عالم اوزره‌ اۉت،

شاه مشرب قانی سېنده اوردی طغیان، اۉزبېگیم.

شعریت نینگ گُلشنیده سۉلدی محزون نادره،

سيم تننی یوودی کۉز یاش، کۉمدی ارمان، اۉزبېگیم.

ییغله‌دی فرقتده فرقت هم مقیملیکده مقيم،

نالیشینگدن هندو افغان قیلدی افغان، اۉزبېگیم.

تاریخینگ بیتمککه، خلقیم، مینگته فردوسي کېره‌ک،

چونکه‌ بیر بار چېککن آهینگ مینگته داستان، اۉزبېگیم.

آرتده قالدی کهنه‌ تاریخ، آرتده قالدی درد، ستم،

کېتدی وهمینگ، بیتدی زخمینگ، تاپدی درمان، اۉزبېگیم.

بۉلدی آسمانینگ چراغان طالع خورشیدی بیلن،

بۉلدی عصري تیره‌ شامینگ شعله افشان، اۉزبېگیم.

مېن وطننی باغ دېب ایتسم، سېنسن اونده بیتّه‌ گُل،

مېن وطننی کۉز دېب ایتسم، بیتّه‌ مژگان، اۉزبېگیم.

فخر اېترمن، آنه‌ خلقیم، کۉکره‌گیمنی تاغ قیلیب،

کۉکره‌گیده تاغ کۉترگن تنتی دهقان، اۉزبېگیم.

 اۉزبېگیم دېب کېنگ جهانگه نې اوچون مدح اېتمه‌یین!

اۉزلیگیم بیلماققه دوریم بېردی امکان، اۉزبېگیم.

مېن بویوک یورت اۉغلی دیر من، مېن بشر فرزندیمن،

لېک اوّل سېنگه بۉلسم صادق اۉغلان، اۉزبېگیم.

مېنگه پوشکین بیر جهان و مېنگه بیران بیر جهان،

لېک نواي‌دېک بابام بار، کۉکسی آسمان، اۉزبېگیم.

قَیگه بارمه‌ی باشده دۉپّیم، غاز یوررمن، گېرده‌ییب،

عالم اوزره‌ نامی کېتگن اۉزبېکستان، اۉزبېگیم.

 بو قصیده‌م سېنگه، خلقیم،آق سوت و توز حرمتی،

اېرکین اۉغلینگمن، قبول اېت، اۉزبېگیم، جان اۉزبېگیم.

 

اېرکین واحدوف ۱۹۶۸



شو موضوعده