اۉزبېگیم (قصیده)
سهشنبه ۲۶ جوزا
-
-
اۉزبېک ادبیاتی ← شعر
-
سهشنبه ۲۶ جوزا
اۉزبېگیم (قصیده)
تأریخینگدیر مینگ عصرلر ایچره پنهان، اۉزبېگیم،
سېنگه تېنگداش پامیر و آقساچ تییانشان، اۉزبېگیم.
سۉیلهسین افراسیاب و سۉیلهسین اۉرخون خطی،
کهنه تاریخ شادهسیده بیرته مرجان، اۉزبېگیم.
البېروني، الخوارزمي، الفاراب اولادیدن،
اصلی نسلی بلکه اۉزلوق، بلکه ترخان، اۉزبېگیم.
اۉتدیلر شۉرلیک باشینگدن اۉینهتیب شمشیرلرین
نېچه خاقان، نېچه سلطان، نېچه مینگ خان، اۉزبېگیم.
تاغلرینگ تېگرهنگده گۉیا بۉغمه اژدر بۉلدی۔یو،
ایکّی دریا - ایکّی چشمینگ، چشمِ گریان، اۉزبېگیم.
قیصرِ روم نیزهسیدن بغریده داغ اوزره داغ،
چینگیز و باتو تیغیگه کۉکسی قلقان، اۉزبېگیم.
یاغدی تۉرت یاندین عصرلر باشینگگه تير و کمان،
عمری قربان، ملکی تاراج، یورتی ویران، اۉزبېگیم.
دَور ظلمیگه و لېکن بیر عمر باش اېگمهدینگ،
سېن - مقنّع، سربدار - سېن، اېرکسېور خان، اۉزبېگیم.
سېن نه زردوشت، سېن نه بودي، سېنگه نه آتش، صنم،
آدميلیک دینی بیرله تازه ایمان، اۉزبېگیم.
معرفتنینگ شعلهسیگه تلپینیب ظلمت ارا،
کۉزلرینگده آقدی تونلر کوکبستان، اۉزبېگیم.
توزدی۔یو میرزا اولوغبېک کۉرهگانين جدولین،
سِرلی آسمان طاقیگه ایلک قۉیدی نروان، اۉزبېگیم.
میر علیشېر نعرهسیگه عکس۔صدا بېردی جهان،
شعریت ملکیده بۉلدی شاه و سلطان، اۉزبېگیم.
علم و شعرده شاه و سلطان، لېک تقدیریگه قول،
اۉز اېلیده چېکدی غربت، زار و نالان، اۉزبېگیم.
میرزا بابر - سېن، فغانینگ سالدی عالم اوزره اۉت،
شاه مشرب قانی سېنده اوردی طغیان، اۉزبېگیم.
شعریتنینگ گُلشنیده سۉلدی محزون نادره،
سيم تنینی یوودی کۉز یاش، کۉمدی ارمان، اۉزبېگیم.
ییغلهدی فرقتده فرقت هم مقیملیکده مقيم،
نالشینگدن هند و افغان قیلدی افغان، اۉزبېگیم.
تأریخینگ بیتمککه، خلقیم، مینگته فردوسي کېرهک،
چونکه بیر بار چېککن آهینگ مینگته داستان، اۉزبېگیم.
آرتده قالدی کهنه تاریخ، آرتده قالدی درد، ستم،
کېتدی وهمینگ، بیتدی زخمینگ، تاپدی درمان، اۉزبېگیم.
بۉلدی آسمانینگ چراغان طالع خورشیدی بیلن،
بۉلدی عصرِ تیره شامینگ شعله افشان، اۉزبېگیم.
مېن وطننی باغ دېب اَیتسم، سېنسن اونده بیرته گُل،
مېن وطننی کۉز دېب اَیتسم، بیرته مژگان، اۉزبېگیم.
فخر اېترمن، آنه خلقیم، کۉکرهگیمنی تاغ قیلیب،
کۉکرهگیده تاغ کۉترگن تنتی دهقان، اۉزبېگیم.
اۉزبېگیم دېب کېنگ جهانگه نې اوچون مدح اېتمهیین!
اۉزلیگیم بیلماققه دَوریم بېردی امکان، اۉزبېگیم.
مېن بویوک یورت اۉغلیدورمن، مېن بشر فرزندیمن،
لېک اوّل سېنگه بۉلسم صادق اۉغلان، اۉزبېگیم.
مېنگه پوشکین بیر جهان و مېنگه بایرون بیر جهان،
لېک نواییدېک بابام بار، کۉکسی آسمان، اۉزبېگیم.
قَیگه بارمهی باشده دۉپّیم، غاز یوررمن، گېردهییب،
عالم اوزره نامی کېتگن اۉزبېکستان، اۉزبېگیم.
بو قصیدهم سېنگه، خلقیم، آق سوت و توز حرمتی،
اېرکین اۉغلینگمن، قبول اېت، اۉزبېگیم، جان اۉزبېگیم.
۱۹۶۸
مؤلفنینگ باشقه مقالهلری
کۉپ اۉقیلگن مقالهلر
-
محمد عالم کوهکن شعرلریدن نمونهلر
دوشنبه ۴ جوزا -
«خمسه»نینگ یرهتیلیش جریانی
پنجشنبه ۲۱ جوزا -
-
اۉزبېکستان اۉزبېک ادبي تیلیدهگی ایریم قۉپال سۉزلرنینگ فهرستی
سهشنبه ۱۹ جوزا