کییک بیلن کادی
چهارشنبه ۲۷ جوزا
-
-
بالهلر ادبیاتی ← اېرتکلر
-
چهارشنبه ۲۷ جوزا
کییک بیلن کادی
بار اېکنده یۉق اېکن، آچ اېکنده تۉق اېکن. بیر کییک بار اېکن. او کییکنینگ تاغ کمریده اویهسی بار اېکن. اویهسینینگ یانیده بیر تېرهک بار اېکن. بیر آدم کېلیب شو تېرهککه کادی آسیب قۉییبدی. کادی شمالدن کونین ترهقلب، تونین ترهقلب تورر اېکن. کادی آسیلگن کوندن باشلب کییک اویهسیدن چیقه آلمهی قالیبدی. کییک هر کونی استه اویهسینینگ آغزیگه کېلیب قرهب، ینه کادینینگ ترهقلهگنینی اېشیتیب، «مېرگن بۉلسه کېرهک» دېب قۉرقیب، اوینینگ تۉریگه قاچیب کیریب کېتر اېکن. شوندهی قیلیب کییک هفته - اۉن کونگچه چیقه آلمهی، آچلیکدن حالی کېتیب: «کېل۔اې، آچدن اۉلگونچه مېرگن آتسه هم یاروغ دنیانی کۉریب اۉلهی» دېب، استه اویهسینینگ آغزیدن چیقیب قرهسه، شمالدن درختگه اوریلیب تۉق۔تۉق اېتیب تورگن کادی اېکن. «اې، بو کادی کۉپدن بېری ایشیمنی قیلدی۔کو. بونی تېرهکنینگ باشیدن آلیب توشیب بیلگنیمنی قیلهی» دېب تېرهک باشیگه چیقیب کادینی آلیب توشیبدی. کادینی قویروغیگه باغلب، جانی باریچه چاپیب تاغ۔و تاشلرگه اوریب ترهقلهتیبدی. آخری اۉزی چرچب: «اېندی سېنی بیر بۉلدیقلهتهی» دېب کادینی قویروغیگه محکم باغلب، بولاق یانیگه کېلیب سېکین بولاققه سالیبدی. کادینینگ ایچیگه سوو تۉلیب، کییکنی سوو تگیگه تارته باشلبدی. کییک یوقاریگه تارتیبدی. کییکنینگ قویروغی شرتّه اوزیلیب کېتیبدی. کییک بیر چېکّهگه باریب: «واه، مېنینگ قویروغیم اوزیلمهگنده، کادی مېنی سووگه چۉکتیریب اۉلدیرگن بۉلر اېدی. اېندی بیر نهار قیلیب آلهی»، دېب تورگنیده، یانیگه یېتّیته کییک کېلیب قالیبدی.
- هه جۉره، نیمهگه دُمینگ تۉمتاق بۉلدی؟ - دېبدی. بو کییک:
- اې جۉرهلر، بو اۉن کون اوییمگه قمب قۉیدی. آچلیکدن اۉلیب قالهی دېدیم. اخیری مېن اونی الدهب قۉلگه توشیردیم. قویروغیمگه باغلب، تاغگه آلیب چیقیب ترهقلهتیب یوردیم. کېین سووگه آلیب توشیب بۉلدیقلهتهمن دېب، قویروغیمگه باغلگنیمچه سووگه سالگن اېدیم، مېنگه زۉرلیک قیلدی. «جان، کادیجان، دۉستیم دېسم هم قولاق سالمهی، قویروغیمنی یولیب سوو تگیگه توشیب کېتدی. شوندهی قیلیب، تۉمتاق بۉلیب قالدیم»، - دېبدی. جۉرهلری:
- اې جۉره، اونی بیزلرگه کۉرست، اوندن اۉچینگنی آلیب بېرهیلیک، - دېب بولاققه قرهب کېتیشیبدی.
یوریب۔یوریب بولرنینگ آلدیدن بیر خرمن چیقیب قالیبدی. دُمی تۉمتاق کییک:
- اې جۉرهلر، مېنده بیر مصلحت بار، - دېبدی.
جۉرهلری:
- هه، نیمه مصلحت؟ - دېییشیبدی. چۉلتاق کییک:
- منه شو خرمننی ینچیب آلیب کېتسک۔چی، - دېبدی.
جۉرهلری:
- اېگهسی کېلیب قالسه، قندهی قیلهمیز، - دېبدی. چۉلتاق کییک:
- اېگهسینی مېن بیلهمن، اونینگ اویی آلیس، - دېبدی. جۉرهلری:
- میلی بۉلمهسه، خۉبچی[1] کیم بۉلهدن؟ - دېبدی. چۉلتاق کییک:
- خۉبچی مېن۔ده، اۉلننی یخشی بیلهمن، - دېبدی.
جۉرهلری چۉلتاق کییکنینگ مصلحتیگه کیریب، خرمن یانیگه کېلیشیبدی. چۉلتاق کییک بیر۔بیراوینی متشتیریب باغلهماقچی بۉلیبدی. جۉرهلری:
- اې جۉره، بۉینیمیزدن باغلهمهیسن می؟ - دېبدی. چۉلتاق کییک:
- بۉینینگیزدن باغلهسم، مېرگن کېلیب قالسه، بۉشتگونچه آتیب قۉیهدی. قویروقلرینگدن باغلهیمن. مېرگن کېلگن وقتده اۉزی یېچیلیب کېتهدی، - دېبدی. همهسینینگ قویروغیدن متشتیریب باغلب، بوغدای خرمنیگه سالیب، اۉلن ایتیب هَیدهی بېریبدی. بیر آز هَیدهگندن کېین:
- وای، آدم ایسی کېلهیپتی، - دېبدی. ینه او یاق۔بو یاققه قرهب: - مېرگن کېلیب قالدی، - دېب توریب قاچیبدی. بولرنینگ همهسی «مېرگن کېلیب قالدی، - دېب بیری بو یاققه، بیری او یاققه تارتیب قاچیبدی. شوندهی قیلیب، کییکلرنینگ قویروغی اوزیلیب، چۉلتاق بۉلیب قالگن اېکن. خۉبچی کییک قاچگنیچه قاچیب کېتگن اېکن.
[1] خۉبچی - خرمنچی
کۉپ اۉقیلگن مقالهلر
-
محمد عالم کوهکن شعرلریدن نمونهلر
دوشنبه ۴ جوزا -
«خمسه»نینگ یرهتیلیش جریانی
پنجشنبه ۲۱ جوزا -
-
اۉزبېکستان اۉزبېک ادبي تیلیدهگی ایریم قۉپال سۉزلرنینگ فهرستی
سهشنبه ۱۹ جوزا