مناجات
شنبه ۱۰ اسد
-
-
اۉزبېک ادبیاتی ← شعر
-
شنبه ۱۰ اسد
مناجات
یارب، کرم اېت بو بېنواغه،
امرینگنی اونوتمهگن گداغه.
سېنگه سیغینیب رجا قیلورمن،
اخلاص ایله التجا قیلورمن.
درگاهینگگه خالصانه قۉندیم،
حمدینگنی یازرگه خامه یۉندیم.
سینگن قلمیمگه تیل عطا قیل،
سۉز صنعتی بیرله آشنا قیل.
حمدینگ اَیِیتورگه تیل چۉزیلسه،
اۉی ایلدیزی اۉزگهدن اوزیلسه.
جان پردهسینی کۉنگیل قیتیغلب،
وحدت قۉشیغینی کویلر ییغلب.
حق کویچیسی سرفراز اۉسگهی،
خلق ایچره ادبنواز اۉسگهی.
عرفان سۉزی جانگداز اېرمیش،
نَی نالیشیگه نیاز اېرمیش.
مېن تېلبهنی معرفت هواسی،
تانگ چاغی حُدیچیلر نواسی.
چارلردی مدیحه کویلهماققه،
دل خانقهسیده سویلهماققه.
مېن اوشبو سېویملی مرحمتدن،
ایچکویدیرووچی صمیمیتدن.
خورسند بۉلیب تفکـر اېتدیم،
هاتف سۉزیدن تشکر اېتدیم.
معني ایسی تاولَنیب بناگاه،
اېسدی و بنیم۔له بۉلدی همراه.
اېلتدی مېنی باغ ارا یېتکلب،
اوندن نری تاغ ارا یېتکلب.
گل کۉرکی اوزه نظاره اېتدیم،
لالهگه نظر دوباره اېتدیم.
حق رحمتیدن آلیب بشارت،
شبنم سوییگه اېتیب طهارت.
هرقیسی چۉزیب تیل حضرتینگگه،
مشغول اېدی عبادتینگگه.
کېزدیم یقهلب اریغ یقاسین،
سیر اېتگهلی بۉستان فضاسین.
ذاکرلر اویوشگنینی کۉردیم،
حق ساری سویوشگنینی کۉردیم.
بیر قیرّهده باش اېگیب بنفشه،
ساجد کبی ذکر اېتردی انچه.
گل تامیریگه چیزیب مطرنی،
قورشب قووانرلی سبحهلرنی.
ذکر اېتگهلی غنچهلب آچردی،
نازک دوداغی ایپر ساچردی.
کۉک ساری چنار باش چیقاریب،
آسمان اۉپر اېللرین کۉتاریب.
اون چېکمهیین التجا اېتردی،
بویله یَلینیب دعا اېتردی.
کۉکلم یېلی مشکبار بۉلسین،
ملت همه بختیار بۉلسین.
بو اېزگو خیال لذتیدن،
اۉیلاوگه چۉمیش حلاوتیدن.
بلبل کبی شادیانه کویلب،
مستانه گۉزل ترانه کویلب.
دل سېزگیسینی عیان اېترگه،
آچدیم لب اونی بیان اېترگه.
یارب سېنی(نگ) قدرتینگ انیقدیر،
جۉش اورگوچی رحمتینگ تنیقدیر.
بیرتامچیسی اېتگهی اۉتنی سېراب،
سیرقیندیسی بل کۉکتنی شاداب.
فضلینگ صفتی جهانگه سیغمس،
بلکه یېر و آسمانگه سیغمس.
اولدم که جهاننی سېن یراتدینگ،
آی بیرله قویاشنی کۉککه آتدینگ.
خلقت هدفی اېتیلدی اظهار،
کۉز اۉنگیده جلوه قیلدی اسرار.
اوشبو کرمینگ هدایت اېرمیش،
حق ساری اولوغ بشارت اېرمیش.
عاقل کیشی تۉغری یۉلگه یورگهی،
غافل ایشی، اېگریلیککه سورگهی.
قرآن سۉزی بیزگه رهنمادیر،
هرآیتی مظهرِ صفادیر.
دل لذت آلور بلاغتیدن،
طبعیم قووانور تلاوتیدن.
یارب، عظمتلی قُوتْلی ذاتیگ،
یولدوزلی سپهر۔و کائیناتینگ.
حیرتگه قۉیر بشر حیاتین،
بیلمس کیشی هېچ کنه ذاتین.
فکریم نې اوچون توبیگه یېتمس،
خامه تیلی سینگن اۉلسه بیتمس.
یارب، سېنی (نگ) حکمتینگ فزوندیر،
بیزگه کرمینگ نې گونهگوندیر.
کویلشگه زبان عطا قیلیبسن،
انگلش یاروغین عصا قیلیبسن.
برچه حسنات و نعمتینگگه،
ناز و نعم و عنایتینگگه.
اَیتگهیمیز همیشه عرض شکران،
شکر اېتگووچیگه قیلورسن احسان.
نرگس قمیشین تېریب تۉقَیدن،
یۉنسم قلمیم تیلینی نَیدن.
احسانینگ اوچون ترانه چېکسم،
یوز مینگدن آشیغ بنانه چېکسم.
بیر حرف حقینی ادا قیلالمم،
شکرانهسینی بجا قیلالمم.
(محمد امین متین اندخویی)
مؤلفنینگ باشقه مقالهلری
کۉپ اۉقیلگن مقالهلر
-
نوایینینگ یازیلمهی قالگن اثری
سهشنبه ۲۶ جوزا -
-
محمد عالم کوهکن شعرلریدن نمونهلر
دوشنبه ۴ جوزا -
شهریار شوکت و اونینگ شعرلری
شنبه ۲۰ سرطان