جوزجان بیلیم یورتیده اۉزبېک تیلی و ادبیاتی بۉییچه ماسترلیک پروگرامی تشکیل اېتیلدی
یکشنبه ۱۵ سنبله
-
-
جمعیت و مدنیت
-
یکشنبه ۱۵ سنبله
جوزجان بیلیم یورتیده اۉزبېک تیلی و ادبیاتی بۉییچه ماسترلیک پروگرامی تشکیل اېتیلدی
«جوزجان بیلیم یورتیده اۉزبېک تیلی و ادبیاتی بۉییچه ماسترلیک پروگرامی تشکیل اېتیلدی. مذکور پروگرامی افغانستانده اوشبو متخصصلیک بۉییچه بیرینچی ماسترلیک پروگرامی حسابلنهدی.»
ینگی ماسترلیک پروگرامی ۱۴۰۵۔ییل ۱۵۔سنبله، یکشنبه کونی افغانستان عالي اۉقوو وزیرلیگی عالي کېنگشینینگ ییغیلیشیده یکوني تصدیقلنگن ۳۳ ماسترلیک پروگراملریدن بیریدیر.
مذکور پروگرامگه بوندن قریب بیر ییل اوّل افغانستان عالي اۉقوو وزیرینینگ جوزجان بیلیم یورتیگه تشریفی چاغیده دستلبکی رخصت بېریلگن اېدی. شوندن کېین پروگرامگه عاید مأموري و اکادمیک حجتلرنی تیّارلش همده تصدیقلش ایشلری جوزجان بیلیم یورتی و عالي اۉقوو وزیرلیگینینگ تېگیشلی باسقیچلریده دوام اېتتیریلدی.
اوشبو دور مابینیده ماسترلیک پروگرامینینگ «پالیسي سندی و تحصیلي نصابی» ایشلب چیقیلدی. تیّارلنگن حجتلر جوزجان بیلیم یورتیده همده عالي اۉقوو وزیرلیگیده بېلگیلنگن ترتیبده کۉریب چیقیلیب، تېگیشلی باسقیچلردن اۉتکزیلدی. شوندن سۉنگ پروگرام عالي اۉقوو وزیرلیگینینگ ماسترلیک پروگراملریگه عاید کمیسیونیگه تقدیم اېتیلدی و اونینگ مضمونی بۉییچه تقدیمات اۉتکزیلدی.
کمیسیون تامانیدن معقوللنگن ماسترلیک پروگرامی ۱۴۰۵۔ییل ۱۵۔سنبله کونی عالي اۉقوو وزیرلیگی عالي کېنگشیده کۉریب چیقیلیب، یکوني تصدیقدن اۉتکزیلدی.
جوزجان بیلیم یورتی اجتماعي بیلیملر فاکولتهسی اۉزبېک تیلی و ادبیاتی دیپارتمنتی علمي خادمی پوهنمل نجیبالله عصمتينینگ اَیتیشیچه، ینگی ماسترلیک پروگرامی عیناً شو فاکولتهنینگ اۉزبېک تیلی و ادبیاتی دیپارتمنتیده تشکیل اېتیلگن.
عصمتي مذکور پروگرام افغانستانده اۉزبېک تیلی و ادبیاتی بۉییچه «بیرینچی ماسترلیک پروگرامی» اېکنینی تأکیدلهدی.
«بو پروگرام جوزجان بیلیم یورتی رهبریتی همده اجتماعي بیلیملر فاکولتهسی اۉزبېک تیلی و ادبیاتی دیپارتمنتی استادلرینینگ کۉپ مدتلیک سعی۔حرکتلری و کتّه محنتی نتیجهسیده تشکیل اېتیلدی»، - دېدی پوهنمل نجیبالله عصمتي.
اونینگ سۉزلریگه کۉره، پروگرامگه رخصت آلینگنیدن کېین اونینگ پالیسي سندی و تحصیلي نصابینی ایشلب چیقیش بۉییچه قریب بیر ییل دوامیده منتظم ایش آلیب باریلگن.
«اوشبو پروگرام اوچون محنت بازاری احتیاجلریگه ماس همده خلقارا مېزانلرنی حسابگه آلگن زمانوي اۉقوو دستوری (تحصیلي نصاب) ایشلب چیقیلدی. تحصیلي نصابنی تیّارلشده اۉزبېکستان عالي اۉقوو مؤسسهلریدهگی اۉزبېک تیلی و ادبیاتی، اۉزبېک تیلشناسلیگی همده اۉزبېک ادبیاتشناسلیگی بۉییچه ماسترلیک پروگراملری تحصیلي نصابیدن الگو آلیندی و فایدهلنیلدی»، - دېیه تأکیدلهدی عصمتي.
اونینگ قید اېتیشیچه، تحصیلي نصابینی ایشلب چیقیشده بیر تاماندن افغانستان عالي اۉقوو وزیرلیگی و افغانستان دولتینینگ بېلگیلنگن طلبلری، ایکّینچی تاماندن اېسه منطقهدهگی و خلقارا عالي اۉقوو مؤسسهلرینینگ تېگیشلی معیارلری حسابگه آلینگن.
ینگی ماسترلیک پروگرامی اۉزبېک تیلی و ادبیاتی بۉییچه لیسانس باسقیچینی تماملهگن بیتیرووچیلرنینگ تحصیلینی اۉز متخصصلیگی بۉییچه ماسترلیک درجهسیده دوام اېتتیریشی اوچون امکانیت یرهتهدی.
عینِ پیتده افغانستانده اۉزبېک تیلی و ادبیاتی بۉییچه لیسانس درجهسیده متخصصلر تیّارلهیدیگن بیر قطار عالي اۉقوو مؤسسهلری موجود. بېریلگن معلوماتلرگه کۉره، جوزجان، کابل، تخار، بغلان، بلخ، سرپل و فاریابدهگی بیلیم یورتلرده اۉزبېک تیلی و ادبیاتی بۉییچه تېگیشلی دیپارتمنتلر فعالیت یوریتهدی.
ینگی ماسترلیک پروگرامینینگ تشکیل اېتیلیشی مذکور یۉنهلیش بیتیرووچیلرینینگ عالي اۉقوونینگ کېینگی باسقیچیده اۉقیشینی دوام اېتتیریش امکانیتینی کېنگهیتیریش بیلن بیرگه، اۉزبېک تیلی و ادبیاتی بۉییچه علمي تدقیقاتلر آلیب باریش اوچون هم ینگی شرایط یرهتهدی.
مذکور پروگرام دایرهسیده اۉزبېک تیلینینگ تیلشناسلیک جهتلری، اۉزبېک ادبیاتینینگ نظري و عملي مسألهلری همده تېگیشلی علمي یۉنهلیشلرده تدقیقاتلر آلیب باریش اوچون اکادمیک امکانیتلر کېنگهییشی کوتیلماقده.
پوهنمل نجیبالله عصمتينینگ تأکیدلشیچه، ینگی ماسترلیک پروگرامی کېلگوسیده افغانستانده اۉزبېک تیلی و ادبیاتی بۉییچه «دوکتورا باسقیچینی تشکیل اېتیش اوچون هم زمین یرهتیشی ممکن».
عموماً آلگنده، جوزجان بیلیم یورتیده اۉزبېک تیلی و ادبیاتی بۉییچه ماسترلیک پروگرامینینگ تشکیل اېتیلیشی افغانستانده مذکور تیل و ادبیات یۉنهلیشیدهگی عالي اۉقوو همده علمي تدقیقاتلرنینگ کېینگی رواجی اوچون مهم قدمدیر. اینیقسه، لیسانس باسقیچینی تماملهگن یاش متخصصلر اوچون اۉز متخصصلیگی بۉییچه ماسترلیک درجهسیده تحصیل آلیش امکانیتینینگ یرهتیلیشی ساحهدهگی علمي کادرلر صلاحیتینی آشیریشگه خدمت قیلهدی.
مؤلفنینگ باشقه مقالهلری
کۉپ اۉقیلگن مقالهلر
-
شهریار شوکت و اونینگ شعرلری
شنبه ۲۰ سرطان -
مناجات
شنبه ۱۰ اسد -
نوایینینگ یازیلمهی قالگن اثری
سهشنبه ۲۶ جوزا -
