سیچقانلر دمیگه اېلک باغلنگ
چهارشنبه ۲۰ جوزا
-
-
اۉزبېک ادبیاتی ← حکایه
-
چهارشنبه ۲۰ جوزا
سیچقانلر دمیگه اېلک باغلنگ
سیچقانلر قۉلیدن مینگ دااا...د! یوز فریاد!
عزیزلر، دنیادهگی برچه عذاب۔عقوبتلرگه چیدهسه بۉلرکن، لېکن تېکینتاماق سیچقانلر جفاسیگه سیره هم چیدهب بۉلمس اېکن. نېگه دېیسیز می؟ اۉزینگیز بیر اۉیلب کۉرینگ، بو تېکینتاماقلر بار۔یۉغینگیزنی آرقهلب کېتهوېرسه، سیز اېسه آرتیدن بۉزریب تماشا قیلیب تورهوېرسنگیز. نخات که بو ظلمگه چیدهش آسان دېیسیز! اېنگ دهشتلیسی شو که، اۉغیرلهیدیلر، یېیدیلر، ییغهدیلر، لېکن هیچ تۉیمهیدیلر. اگر بو یالمانغیزلر یېب تۉییشلرینی بیلگنده اېدی، تقدیرگه تن بېریب، هر بیر عایله اولردن بیرته۔یریمتهسینینگ، شونچه که ثواب اوچون، قارنینی یاغلب توریشگه راضی بۉلر اېدی.
باشینگیزنی آغریتیب نیمه قیلهی؟ کېلینگ، بولر قۉلیدن چېککن جفام، تارتگن عذابلریم تۉغریسیده سیزلرگه گپیریب بېرهی.
هر بیرینگیزنینگ اوییده بۉلگنی کبی، مېنینگ اوییمده هم، حضورلری اوچون هیچ قندهی پروتوکولگه امضا قیلمهگنیم حالده، اولرنینگ بیر لشکری یشهیدی. سیزلردن یشیریب نیمه قیلهی؟ کیریمیم شونچه که، فقط اۉز باله۔چقهلریمگه ایلّه یېتهدی. عایله یانیده بو یېب۔تۉیمسلرنی هم باقهدیگن بۉلسم، بۉینیمگه کچکول تاقیب بازارگه چیقیشیمگه یا منه شو تېکینتاماقلر بیلن تیل تاپیشیب، قاپنینگ آغزینی توتیشیمگه تۉغری کېلهدی. مېنینگ اېسه، ایکّلهسی هم قۉلیمدن کېلمهیدی. شوندهی اېکن، آسانراق بیر یۉل تاپیشیم کېرهک. اۉزیم بیلن انچهگچه مشوره۔مصلحت قیلگندن کېین، اولرگه قرشی کورهشگه بېل باغلشگه قرار قیلدیم. بالهلر تاماغیدن اوریب ایکّیته قاپقان ساتیب آلدیم. بو ایشیم نتیجه بېرمهدی - موغامبیرلر قاپقاندهگینی شوندهی مهارت بیلن یولیب آلهدیگن بۉلدیلر که، بېچاره قاپقانلر سېزمهی قالدیلر.
بو ایشیمدن نتیجه کۉرمهگندن کېین، دوستلر بیلن بو تۉغریده مصلحتلشدیم. دوستلرنینگ کۉپچیلیگی موشوک اسرهشیمنی توصیه قیلدیلر. مېن اېسه، بو بارهده هم انچهگینه اۉیلب کۉردیم - موشوک اسرهش، نانخورلر قطاریگه ینه بیتّه قۉشیلیش دېگنی اېمس میکن؟! آخر قندهی بۉلسه هم بو عذابدن قوتیلیشم کېرهک۔کو... باشقه علاج تاپمهگندن کېین دوستلرنینگ مصلحتیگه راضی بۉلیشگه مجبور بۉلدیم. اسرهگن موشوگیم انچهگچه نابلدلیک قیلیب، ینگی محیطدن چۉچیب یوردی. آرهدن بیر مونچه وقت اۉتگچ، موشوگیم بیرته۔یریمته سیچقان توتهدیگن بۉلیب قالدی. بو ایشیم نتیجه بېردی دېب، قووانچیم ایچیمگه سیغمهدی. افسوس که، بو قووانچیم اوزاققه بارمهدی. مقتهگن موشوکلرینینگ تگی چیقیب قالدی. عقلگه سیغمهیدیگن بیر ایش بۉلدی. سیچقانلر نیمه قیلدیلر۔و موشوکنی اۉزلریگه آغدیریب آلدیلر. آلدینلری مېندن حذر قیلهدیگن سیچقانلر، اېندی مېندن هم قۉرقمهیدیگن بۉلیب قالدیلر. انبارلرنی یېب۔یملب تۉیمهگن بلالر، اېندی موشوکنی اۉزلریگه آرقه قیلیب، دستورخوان اوستیدن هم یولهدیگن بۉلدیلر.
هه، شوندهی، دوستلریم...
طبیبگه بارمه، سرگذشتگه بار دېگنلریدېک، مېنینگ هم سیزلرگه مصلحتیم شو که، سیچقانلردن قوتیلیش اوچون اصل و نسبی معلوم بۉلمهگن موشوکلرگه سیره ایشانمنگ. یخشیسی، اۉلجهنی اینیگه آلیب کیرالمهسین دېسنگیز، سیچقانلر دمیگه اېلک باغلنگ...
مزار شریف، سنبله آیی، ١٣٧٣
کۉپ اۉقیلگن مقالهلر
-
محمد عالم کوهکن شعرلریدن نمونهلر
دوشنبه ۴ جوزا -
-
مېنی هم تورتیب قۉی، اېرته اویغانسنگ...
دوشنبه ۱۸ جوزا -
اۉزبېکستان اۉزبېک ادبي تیلیدهگی ایریم قۉپال سۉزلرنینگ فهرستی
سهشنبه ۱۹ جوزا