قامتینگیز تیک بۉلیشی اوچون بېش مصلحت
یازووچی:
|
2۔دلو 1404 - 2026-01-22
|
ساغلیک
قامتینگیز تیک بۉلیشی اوچون بېش مصلحت
بیزنی خواطرگه سالهدیگن نرسهلرده بیری اکثریت وقتیمیزنی
اۉتیریب اۉتکزیشیمیزدهدیر. بو ضررلی عادت بیر قطار کۉنگیلسیز عاقبتلرگه آلیب کېلهدی.
نارسا قامت، توشکون کیفیت، ساچ نینگ تۉکیلیشی، قان کمهییشی – بو هلی همهسی اېمس…
خلص، حرکتسیز کون ترتیبینی قَیته کۉریب چیقیلمسه، بو یخشیلیککه آلیب کېلمسلیگی
انیق. قوییده دقّتینگیزگه حواله اېتیلهدیگن عادي بېش اصول قامتینگیزنی رسا،
اۉزینگیزنی اېسه تېتیک حس قیلیشینگیزگه یاردم بېرهدی.
یېلکهلرنی حرکتلنتیریش
کۉپچیلیک اعتبار بېرمهیدیگن عادي جسماني مشق. اونی مېزدن
تورمسدن بجریش ممکن، نتیجهسی اېسه سیزنی قووانتیرهدی. یېلکهلرینگیزنی آلدینگه و
آرقهگه ایلنمه حرکتلنتیریش کورهکلر اۉرتهسیدهگی موسکوللرنی مستحکملشگه و
بۉیینگه دَم بېریشگه یاردم بېرهدی. عیناً شو ایکّی ساحه قامتینگیزنی تیک توتیشگه
خلل بېرووچی یاقیمسیز حسلر اوچون کۉپراق جوابگر.
اېرتهلبکی سپۉرت
اېرتهلبکی یېنگیل بدنتربیه یېلکهلر، بۉیین و قامتنی تیک
توتیشده مهم بۉلگن باشقه موسکول(عضله)لرنی مستحکملهی آلهدی. اېرتهلبدن
قیزدیریلگن موسکوللر آلدیندهگی کۉپ ساعتلی اۉتیریشلرنی یېنگیل اۉتکزیشگه یاردم
بېرهدی. اېرتهلبکی جمناستیک اوچون اېنگ یخشی مشق – عنعنوي ختای سیگونی، اونده
حرکتلر ثمرهلی نفس آلیش بیلن اویغونلشگن. قامت موسکوللرینی قیزدیریش اوچون
تارتیشیش مشقلری عینِ مدعا.
باشنی تۉغری توتیش
اومورتقه پاغانهسیدهگی اېگریلیککه کۉپینچه «تېکست نېسک»
سیندرمی (باش نینگ آلدینگه اېنگَشیشی) سبب بۉلهدی. بوندهی سیندرم کمپیوتر
قرشیسیده ایشلهگنده، تیلیفونلردن فایدهلنگنده و اوزاق وقت مطالعه قیلیش نتیجهسیده
آرتتیریلهدی. بولر نینگ برچهسی اومورتقه پاغانهسی نینگ قییشهییشیگه آلیب کېلهدی.
دوالش چارهسی صفتیده بۉیین اوچون مشقلر بجریش توصیه قیلینهدی – باشنی هر
تامانگه نوبتمه-نوبت قرهتیش، ایلنتیریش و اومورتقه پاغانهسی نینگ بۉیین ساحهسیدهگی
حرکتلر خیلمه-خیل بۉلیشی مقصدگه موافق.
دېوارگه یاپیشیب تیک توریش
اومورتقه پاغانهسینی یخشیلش اوچون مرکّب مشقلرنی بجریش
شرط اېمس – دېوارگه آرقه اۉگیریب تیک توریب، ماکسیمال درجهده بۉشهشیش و شوندهی
حالتده بیر مدت قالیش نینگ اۉزی یېترلی. بو کبی مشقلر تنهدهگی مقابللیکنی حس
قیلیش و معمالرنی انیقلش امکانینی بېرهدی. کېینگی قدم – دېوارگه یاپیشگن حالتده
اۉتیریب توریش مشقلرینی بجریش.
شاوآسانا
کلاسیک «مُرده پوزهسی» – شاوآسانا یوگا تخنیکی نینگ اساسی
حسابلنهدی. او انسانگه یېنگیللیک بخش اېتهدی و بوتون تنهنی ماکسیمال درجهده
اۉرگنیشگه آلیب کېلهدی. شاوآسانانی بجریش جوده آسان – تېپهگه قرهگن حالتده
قتّيق جایگه (پۉل) یاتینگ، قۉللرینگیزنی تنه بۉیلب چۉزینگ، اۉزینگیزنی بۉش قۉیینگ
و نفسینگیزنی راستلنگ. کمیده 10 دقیقه شاوآسانا حالتیده قالینگ – مشقنی قنچهلیک
منتظم بجریشنی عادت قیلسنگیز، او شونچهلیک فایده کېلتیرهدی.
