صابر سیحان – یازووچی،
پوبلیسیست، حقیقي وطنپرور، مليتچی. اونینگ وطن عشقی، فداییلیک و مليلیک روحی بیلن
سوغاریلگن اثرلری اۉزبېکستان و تورکيهده کۉپ چاپ اېتیلگن.
صابر سیحان ۱۹۳۱ ییلی فرغانه واديسیده – حاضرگی تاشلاق تومنی نینگ سۉلیم جایلریدن بیری مشهور ورزَک
قیشلاغیده تولد تاپگن. صابر سیحان نینگ آتهسی خال محمد خواجه حسام الدین خواجه
مینگباشی اۉغلی اۉتگن عصرنینگ ۲۰۔ییللریده
قۉرباشی شېرمحمدبېک رهبرلیگیده ملي-آزادلیک حرکتیده فعال اشتراک اېتگنلردن بیری.
آنهسی بیبی اولوغ پاشّا قیزی، اۉقیمیشلی، ضیا ترهتووچی آتینآیی عیال بۉلگن.
بووهسی حسام الدین حاجی مینگباشی (اېشان آته) اۉز دوریده یزیاوان مینگباشیسی
بۉلگن. ملي استقلال حرکتی نمایندهلری شېرمحمدبېک و محمد امین بېکلرنینگ قۉلیگه
قورال توتقَزیب، اولرنی بۉلشېویکلرگه قرشی اوروشگه دعوت قیلگن آدم.
شۉرالر حکومتی قتغانلری طفیلی ۱۹۳۱ ییلی صابر سیحان نینگ آته–آنهسی افغانستانگه کتّه قیینچیلیکلر
بیلن کۉچیب اۉتیشگه مجبور بۉلیشگن. شوندن سۉنگ یاش صابرنینگ حیاتی
سرسان-سرگردانلیکده —هندوستانده، پاکستانده، بیر مدت عراقده کېچدی. ۱۹۵۲ ییلی باشقه تورکستانلیک وطنداشلر کبی اولرنینگ عایلهسی تورکيهگه
کۉچیب اۉتهدی. صابر سیحان تورکيهده آلدین ادانا شهریده و ۱۹۶۴ ییلدن باشلب استانبولده یشب کېلیهپتی. یاشلیگیدن ادبیاتگه هوس
قۉیگن صابر سیحان نینگ شعرلری، ایلک حکایهلری، مقالهلری ۱۹۵۳ ییلدن
باشلب اعلان قیلینه باشلهگن.
اۉزبېکستانگه بیرینچی بار ۱۹۷۲ ییلی اۉشه وقتده خارجدهگی وطنداشلر بیلن علاقه قیلیش «وطن»
جمعیتینینگ تکلیفی بیلن تشریف بویورگن. شوندن بېری هر ییلی وطنگه کېلیب کېتهدی.
اۉزبېکستان مستقللیگینی کتّه خورسندچیلیک بیلن کوتیب آلدی. صابر سیحاننینگ
اۉزبېکستانده ۱۹۹۲ ییلی «تجارت و حلال آش» معرفي-تربیوي رسالهسی، ۱۹۹۶ ییلی «ادهشگنلر» ادبي اثری، «تۉلغنآی» و «یېمیریلگن غرور» حکایهلر
تۉپلملرینی چاپ اېتیلیشی اۉزبېک کتابخوانلری تامانیدن یخشی کوتیب آلیندی. بوندن
تشقری ۲۰۰۶ ییلی «وطن قیدیرگن ییگیت» قصهسی نشر
اېتیلگن. او کیشی نینگ اثرلری اساسیده «وطن یگانهدیر»، «بیر سیقیم توپراق»،
«بیراونینگ قرینداشی» کبی تلویزیون فیلملر یرهتیلدی. ۱۹۹۵-۱۹۹۶ ییلی صابر سیحان سناریوسی اساسیده اۉزبېکستانده «سلسله» ناملی
تاریخي، بدیعي فیلم صورتگه آلیندی. صابر سیحان اۉزبېکستانده و خارجدهگی
اۉزبېکلر آرهسیده کېنگ جماعتچیلیککه معلوم، جوده حرمتلی آدم.
